20250122 Wednesday ( Sunrise = 05h57 Sunset = 19h53 )

Seetemperatuur in die Mosambiekkanaal is tans baie warmer as normaal en dit dra by tot laagdrukke wat daar ontwikkel om uiteindelik 'n invloed uit te oefen wat oor land gebeur. Op die oomblik lê daar 'n diep laagdruk op die Mosambiek se kus wat vog oor land deponeer wat dan noord van Zimbabwe na die weste beweeg terwyl die binnelandtrog oor die westelike binneland hervorm. Tropiese lug wat oor Namibië beweeg behoort teen die middag oor die sentrale binneland in te kom met 'n strook donderweer wat noord van Upington begin tot die Vrystaat. Niks groots nie maar dit sal digter saampak oor die Drakensberge waarna dit oos uitbrei. Buiten die Ooskus wat klam bly, kan die res van die land mooiweer verwag.

20250123 Thursday ( Sunrise = 05h58 Sunset = 19h53 )

Die Mosambiek laagdruk beweeg effens suid met gevolg dat donderweer oor land verder noord getrek word. Nou met die hele land oos en noord van die Prieska - Clocolan lyn wat donderweer kan verwag. Dit bly lukraak en verspreid maar steeds met sterker selle wat op die plato tussen die Drakensberge en Swaziland ontwikkel. Donderweer sal ook tussen die Lesotho plato en die see opstaan terwyl 'n laagdruk wat teen die suidkus ontwikkel klammer weer bring maar sonder veel reën.

20250124 Friday ( Sunrise = 05h59 Sunset = 19h52 )

Die Mosambiek stelsel verdiep verder met donderweer oor land wat nou tot die noord en oostelike deel van die land beperk bly. Die wesgrens daarvan strek van Rustenburg tot Bethal en van daar tot die Lesotho platorand. Die noordooste van die Oos-Kaap bly voorlopig steeds klam.

20250125 Saturday ( Sunrise = 06h00 Sunset = 19h52 )

Nog nie verandering nie... steeds 'n diep laagdruk in die Mosambiekkanaal met donderweer wat nou noord van die Rustenburg - Drakensberg lyn ontwikkel maar dit sal niks groots oplewer nie. Die Mosambiek laagdruk sak wel ver genoeg suid dat draaiing om die stelsel 'n bietjie vog oor die Ooskus inbring maar dit sal net klam weer bring... nog nie regtig reën nie.

20250126 Sunday ( Sunrise = 06h01 Sunset = 19h51 )

Buiten los donderselle wat a.g.v. die Mosambiek laagdruk teen die noordoostelike grense van die land ontwikkel, hervorm die binnelandtrog oor die westelike binneland. Namibiese donderweer sal by Upington oor die grens kom maar nie vreeslik ver suid nie. 'n Laagdruk wat egter oor die suidelike puntjie van die land uitgrawe sal klammer weer oor die Overberg en Suid-Kaap bring maar nie met baie reën nie.

20250127 Monday ( Sunrise = 06h02 Sunset = 19h51 )

Die binnelandtrog buig na die suidweste en vorm later deel van die Agulhas laagdruk. Dit sal veroorsaak dat donderweer breed oor land begin uitsak. Die wesgrens daarvan van Upington tot Jongensfontein en die oosgrens van Rustenburg tot Gauteng en van daar tot die Drakensberge. Die suidelike binneland sal ook donderweer kry wat later tot die Suidkus uitbrei maar dit bly lukraak en verspreid. Op hierdie stadium bly dit reënerig oor die oostelike helfte van die Overberg sowel as Suid-Kaap.

20250128 Tuesday ( Sunrise = 06h03 Sunset = 19h50 )

Die Atlantiese Hoogdruk rug suid om die Agulhas laagdruk en met ekstra vog vergroot die kans vir neerslag oor die hele Overberg en suidelike deel van die Boland. Donderweer in die binneland sal verder oos skuif met die wesgrens nou tussen Prieska en Beaufortwes en die oosgrens van Polokwane tot die Drakensberg en van daar tot Oos Londen. Die Ooskus word ook nat maar dit sal ligte reën wees en nie donderweer nie.

20250129 Wednesday ( Sunrise = 06h04 Sunset = 19h50 )

Die laagdruk in die suide beweeg verder oos maar hou die Overberg en Suid-Kaap reënerig terwyl donderweer in die binneland nog verder oos skuif. Nou met die hele land oos van die Prieska - Bloemfontein tot Port-Elizabeth lyn wat donderweer kan verwag. Behalwe dalk die Laeveld en noordooste van KZN wat voorlopig droog bly.

20250130 Thursday ( Sunrise = 06h05 Sunset = 19h49 )

Aanvanklik nog reënerige weer oor die Overberg en Suid-Kaap maar dit sal na sonop wegkwyn terwyl donderweer in die binneland noord skuif. Die suidgrens daarvan nou van Potchefstroom tot die Drakensberge en van daar tot die Keirivier met die hele land noord daarvan wat lukraak en verspreide donderweer kan verwag.

20250131 - 20250206

Alhoewel modelle maar sukkel om tred te hou waar presies siklone in die Madagaskar omgewing ontwikkel lyk dit tog of dit in die begin van Februarie oos van Madagaskar sal bly wat beteken dat weer oor land vir 'n slag sy eie gang sal gaan. Donderweer behoort dus tussen die 31ste en 6de hoofsaaklik dwars oor die land te ontwikkel. Meer oor die westelike deel van die somerreënvalstreek dalk, maar dit behoort ook tot die noorde uit te brei maar sonder enige groot stelsels. Verder is die Agulhas seestroom tans baie warmer as normaal terwyl hoogdrukke relatief dominant begin word. Die hele somer tot nou het ons eintlik baie min suidoosweer gekry met winde wat meerensdeels wes gebly het. Die rede is omdat lugdruk in die noorde so laag gebly het dat kouefronte ongewoon ver noord deurgekom het. Alhoewel daar twee kouefronte tussen die 31ste en 6de deurkom sal dit verder suid wees terwyl ons dan meer oos-weer sal begin kry maar aangesien seewater suid van die land so warm is, sal orografiese opligting teen die suidelike kusgebiede plaasvind. Anders gestel... ons sal nou oos-weer begin kry maar dit sal gepaard gaan met klammer weer... sal dit dophou... (Volgende Voorspelling :- Donderdag 21h00) ... Vrae of kommentaar... weather@twk.co.za.

Legend