20200117 Friday ( Sunrise = 05h56 Sunset = 19h59 )

Die Atlantiese hoogdruk rug vandag suid om die land en bring genoeg vog uit die suide in vir reënerige weer op die suidelike kusgebiede en aangrensende binneland. Die binnelandtrog het intussen effens verdiep en lê nou oor die wes-sentrale binneland. Donderweer behoort uit Namibië, oor die suide van Botswana tot die Noord-Kaap te ontwikkel en suidwaarts, tot die Oos-Kaap se binneland, uit te brei.

20200118 Saturday ( Sunrise = 05h57 Sunset = 19h58 )

Die hoogdruk beweeg verder om land maar die drukgradiënt in die suide is so styf gespan dat momentum alleen genoeg doen om onstabiliteit in die laer atmosfeer te bewerkstellig. Dit veroorsaak terselfdertyd dat vermenging van vogtige lug uit die ooste en warmer droër lug oor die Karoo plaasvind. Donderweer sal gevolglik in 'n ongewone strook voorkom... Van Sutherland in die weste tot Lesotho en van daar met die oostelike platorand langs tot in die noorde van die Limpopo. Die grotes sal egter oor die Drakensberge en die Nelspruit-omgewing opstaan.

20200119 Sunday ( Sunrise = 05h58 Sunset = 19h58 )

Die posisie en stand van die hoogdruk het min verander wat beteken dat die ongemaklik sterk oostewind op die suidkus voortduur. Vroeg in die nag behoort daar ook groot ontwikkeling tussen Beaufortwes en Graaff Reinet te wees. Donderweer in die middag sal weer in dieselfde strook as die vorige dag ontwikkel behalwe in die noorde, waar dit nou tot Gauteng ontwikkel. Die grotes bly egter in die Drakensberg omgewing.

20200120 Monday ( Sunrise = 05h59 Sunset = 19h58 )

Teen Maandag sal die hoogdruk ver genoeg om land wurm om invloei van vog na die Karoo af te sny. Donderweer sal gevolglik uit die weste opklaar en meer tot die binnelandtrog gebonde bly. Dit sal dus uit Botswana tot Noordwes en van daar tot die Noord Vrystaat ontwikkel. Die Oos-Kaap behoort steeds bewolk en reënerig te bly. Dit geld ook vir weer op die Suidkus en aangrensende binneland.

20200121 Tuesday ( Sunrise = 06h00 Sunset = 19h57 )

Die hoogdruk sal op hierdie stadium voelers van hoër lugdruk suid om die land hê en aangesien dit (hoogdruk) geleidelik swakker word, sal dit minder doen om donderweer oor die binneland te bewerkstellig. Die hele strook tussen die oostelike platorand en see bly vir eers bewolk en reënerig.

20200122 Wednesday ( Sunrise = 06h01 Sunset = 19h57 )

Die hoogdruk sal ver genoeg om land kom dat dit oor die noordooste begin instoot. Die binnelandtrog sal gevolglik verder wes gedruk word. Nuwe donderweer behoort in die suide van Botswana en Namibië saam te pak en aangesien hul paspoorte reeds gestempel is sal dit oor die Noord-Kaap en Noordwes Provinsie inkom maar dit behoort nie verder suid as De Aar te vorder nie. Gauteng, Mpumalanga sowel as Noordoos-Vrystaat kan op hierdie stadium verspreid maar ligte donderbuie verwag.

20200123 Thursday ( Sunrise = 06h02 Sunset = 19h56 )

Op Donderdag sal die binnelandtrog die normale wes na oos beweging van weerstelsels volg wat beteken dat die hele strook waarin donderweer voorkom, ook verder oos skuif. Op hierdie stadium natuurlik 'n redelike breë strook... die wesgrens daarvan tussen Mafikeng en De-Aar en die oosgrens tussen Nelspruit en Richardsbaai. Die grotes behoort weer oor die Drakensberge en oostelike deel van Mpumalanga te ontwikkel.

20200124 Friday ( Sunrise = 06h03 Sunset = 19h56 )

Teen Vrydag behoort die hoogdruk, wat suid om die land lê, in twee te skeur maar die binnelandtrog lê min of meer op dieselfde plek. Donderweer behoort in dieselfde stroke te ontwikkel maar dit sal intussen baie oemf verloor.

20200125 Saturday ( Sunrise = 06h04 Sunset = 19h55 )

Die binnelandtrog behoort teen Saterdag so te verswak dat donderweer omtrent heeltemal wegkwyn. Die Atlantiese hoogdruk begin met 'n nuwe poging om suid om die land te kruip... Hierdie keer weer met klammer weer op die Suidkus.

20200126 - 20200202

Goed... die voorspelling is eintlik tot 20200101 maar die "palindroom" nommers lyk so mooi dat ek nie anders kon nie veral as dit eers weer in 30300303 gaan gebeur.... maar dit daar gelos... Wat die weer aan betref sal 'n hoogdruk van die 26ste tot 29ste stadig suid om die land beweeg... Eers met klam weer in die suide waarna dit tot die 29ste kuslangs tot KZN omskuif. 'n Strook donderweer behoort op die 30ste oor die oostelike deel van die binneland te ontwikkel waarna dit a.g.v. 'n hoogdruk in die Indiese Oseaan, tot die 2de, verder wes gedruk word.... ( Volgende Voorspelling :- Donderdag 21h00) ... Vrae of kommentaar... weather@twk.co.za.

Legend